'मुख्यमंत्र्यांनी दिली होती सुरेश धस यांना सूचना' - हर्षवर्धन सपकाळांचा गौप्यस्फोट
बुलढाणा : काँग्रेस प्रदेशाध्यक्ष हर्षवर्धन सपकाळ यांनी संतोष देशमुख हत्या प्रकरणात मोठा गौप्यस्फोट केला आहे. त्यांनी राष्ट्रवादी काँग्रेसचे नेते धनंजय मुंडे आणि भाजप आमदार सुरेश धस यांनी मांडवली केल्याचा आरोप केला आहे. हर्षवर्धन सपकाळ म्हणाले की, मुख्यमंत्र्यांनीच सुरेश धस यांना राष्ट्रवादीचे महत्त्व कमी करण्यासाठी सूचना दिली होती. हा आरोप केल्यामुळे महाराष्ट्राच्या राजकीय वर्तुळात खळबळ उडाली आहे.
सुरेश धस आणि धनंजय मुंडे यांच्या भेटीनंतरच या प्रकरणाने वेगळं वळण घेतलं. हर्षवर्धन सपकाळ यांनी म्हटलं की, 'आधी आका आका आका म्हणणाऱ्यांचं प्रकरण आता मांडवली मांडवली मांडवली या स्तरावर पोहोचलं आहे.' संतोष देशमुख हत्या प्रकरणात सुरेश धस आणि धनंजय मुंडे यांच्यात मांडवली झाल्याचा आरोप करताना सपकाळ यांनी मुख्यमंत्र्यांवरही निशाणा साधला आहे.
सपकाळ म्हणाले, 'मुख्यमंत्री देवेंद्र फडणवीस यांनीच राष्ट्रवादीचे महत्त्व कमी करण्यासाठी सुरेश धस यांना सूचना दिली होती. त्यामुळेच या प्रकरणात मांडवलीची भाषा ऐकू येत आहे.' सपकाळ यांच्या या आरोपांमुळे भाजप आणि राष्ट्रवादी दोन्ही पक्षांमध्ये खळबळ उडाली आहे. राष्ट्रवादीचे नेते आणि कार्यकर्त्यांनी या आरोपांचं खंडन केलं असून, भाजपकडून देखील यावर जोरदार प्रतिक्रिया उमटत आहेत.
प्रदेशाध्यक्ष पदाची सूत्रे हाती घेतल्यानंतर हर्षवर्धन सपकाळ यांनी पहिला वार सुरेश धस यांच्यावर केल्याचं स्पष्ट दिसत आहे. संतोष देशमुख हत्या प्रकरणात मांडवली झाली असल्याचं सांगत त्यांनी धनंजय मुंडे आणि सुरेश धस यांना थेट लक्ष्य केलं आहे. महाराष्ट्राच्या राजकारणात या आरोपांमुळे तापलेलं वातावरण आणखीच तापण्याची शक्यता आहे.
सपकाळ यांच्या या आरोपांमुळे आगामी निवडणुकांमध्ये याचा मोठा परिणाम होऊ शकतो. भाजप, राष्ट्रवादी आणि काँग्रेसमध्ये यामुळे आरोप-प्रत्यारोपांच्या फैरी सुरू होण्याची चिन्हं दिसत आहेत. आता धनंजय मुंडे, सुरेश धस आणि मुख्यमंत्री फडणवीस यांची भूमिका काय राहते, हे पाहणे महत्त्वाचे ठरेल.